مفيش شك ان كرة القدم ليها جمهور كبير جدا جدا فى مصر و الوطن العربى
بس لو لاحظت هتلاقى ان فى مشكلة كبيرة اوى عندنا
هى أن المنظومة الإعلامية و التنظيمية و الإدارية لكرة القدم فى مصر تكاد تكون لا تفقه شئ عن كرة القدم
فى مختلف دول العالم خاليا بقى فى تطور كبير فى منظومة كرة القدم على كل المستويات هى فعلا خدت وقت كبير لكن النتيجة كانت فعالة جدا غير ان الدول دى عندها مشكلة اكبر و هى افتقاد العنصر البشرى الموهوب و ده اللى خلاها اتاخرت جدا فى إفراز المواهب
يعنى مثلا دول زى السعوديه و الامارات و قطر الكرة اتنقلت نقلة تاريخية عندهم و بالاخص السعودية
لكن بسبب قلة المواهب عندهم بدات السعودية تحصد اول جيل من الشباب موهوب و فاهم كورة على مستوى قطاع الناشئين
و ده بان فى مستوى منتخبات السعودية فى بطولات الشباب
و لو بصيت على الدورى السعودى و اتفرجت على اى مباراة مثلا هتستمتع فعلا لوجود كل العناصر المساعدة
ملاعب محترمة اخراج تلفزيونى رائع طبعا غير الجماهير
طيب احنا فى مصر مشكلتنا ايه
احنا عندنا المواهب الفردية اللى فعلا على مستوى و طبعا صلاح و الننى و تريزيجيه خير دليل
و الحمدالله عندنا ملاعب ممتازه
لكن الكرة عندنا محصورة فى اهلى و زمالك و شكرا و اى حاجة تانية ملناش دعوة بيها
طب مثلا اتحاد الكرة حاول انه يعلى بمستوى الدورى تنظيميا عشان يجيب استثمار من نقل تلفزيوني و دعايا و خلافه
لا طبعا
طيب تنظيميا فى ادارة المباريات و الجدول الزمنى و كده
برضه لا حضرتك زبادى فى الخلاط
و رغم كل العك ده حضرتك على مستوى الأندية انت انديتك بتوصل فاينال افريقيا و بتاخدها عادى جدا و معلمة على اندية افريقيا كلها
و على مستوى المنتخب انت شبح افريقيا
طيب عايزك تتخيل بس ان فى مناخ مناسب لممارسة كرة القدم من ناحية ادارية و تنظيمية … تخيلت !؟
بس كده … شفت بقى احنا ممكن نبقى فين !؟
عشان كده بقولك أبطال و لكن
